Доналд Трамп кажа дека мисли оти Володимир Зеленски е спремен да го предаде окупираниот полуостров Крим на Русија како дел од мировен договор, нешто што Киев досега решително го отфрлаше. Тие се сретнаа на маргините на погребот на папата Фрањо во Ватикан во саботата, а по враќањето во Вашингтон, Трамп изјави дека состанокот поминал добро и дека кратко разговарале и за Крим.
Запрашан од новинарите дали смета дека Зеленски е подготвен да го отстапи Крим на Русија, Трамп одговори:
„Мислам дека е“.
Тој исто така кажа дека Зеленски сега изгледал посмирено, откако двајцата имаа жесток вербален судир во Белата куќа во февруари.
„Го повикувам Владимир Путин да запре со пукањето, да седне на маса и да потпише договор“, рече Трамп, додавајќи дека тоа би можело да се постигне во рок од две недели.
Украина досега ги одбиваше сите предлози за територијални отстапки, истакнувајќи дека прво мора да се договори целосен прекин на огнот. Путин и Зеленски не реагираа на последните коментари на Трамп за Крим.
Германскиот министер за одбрана Борис Писториус вчера ја предупреди Украина да не прифаќа договор кој вклучува сеопфатни територијални отстапки во замена за прекин на огнот. Тој го спореди последниот предлог на Трамп со капитулација.
Минатата недела, Трамп кажа дека веќе се договорени повеќето главни точки од мировен договор и според некои извештаи, тоа вклучува признавање на руската контрола врз значајни украински територии, меѓу кои и Крим и целиот регион Луганск. Американскиот план исто така го забранува членството на Украина во НАТО.