Коцевски: Спасовски за Командир на граничен премин Ќафасан поставил лице со отслужена затворска казна за криумчарење,  оставка и одговорност веднаш

Oливер Спасовски за командири на гранични премини поставува луѓе со отслужена казна затвор за криумчарење и шверц.
За командири на гранични премини, наместо луѓе кои ќе се борат против криминалот се поставуваат луѓе кои се искусни во правење на криминал.
Пред само три месеци, на граничниот премин Ќафасан за Командир на граничен премин е поставено лицето Б.А. Ова лице веќе било на истата работна позиција пред десетина години во ек на големата полициска акција за криумчарење на добиток од Македонија во Албанија.
Се работи за аферата “Милка” во која беа опфатени 31 лице, кои биле дел од организиран синџир за криумчарење на добиток. За оваа афера своевремено пишуваа и медиумите. Во рамки на осудените имало и полициски службеници, кои примале поткуп за да ја договорат патеката за криумчарење и кои за тоа наплатувале по 3 ипол евра од килограм добиток.
Лицето Б.А. отслужило казна затвор од 3 ипол години, како дел од синџирот за криумчарење на добиток.
Лицето Б.А. сега повторно е командир на граничен премин било дел од криумчарењето како овластено лице. Истото го извршило тоа кривично дело заради позицијата која ја имало во МВР. 
Истото ова лице сега повторно се наоѓа на позицијата Командир на граничен премин.
Спасовски да каже како е можно ова лице кое е правосилно осудено, со отслужена казна затвор за криумчарење да се постави за Командир на граничен премин? Дали на злосторникот му се дава можност повторно да го изврши кривичното дело? 
Која е пораката која ја испраќа Спасовски и Ковачевски? Дали ова е борбата со криминалот и корупцијата? Спасовски да не чека и веднаш да го разреши лицето Б.А. од функцијата на која сам го поставил. 
Одговорност мора да има и од Спасовски. Ова не е прв скандал во МВР. 7 години е министер за внатрешни работи. 7 години безбедноста е на најниско можно ниво.

Лефков: Поминаа 2 месеци откако ја обелоденивме Броило, Ковачевски во центарот на 26 милионска афера, институциите молчат

Поминаа 2 месеци откако ја отворивме аферата Броило, а одговор од институциите нема.
Премиерот Димитар Ковачевски беше во средина на оваа афера преку која се свртени над 26 милиони евра од фирмите Пиксел груп, на која основач е самиот тој, КМГ ЕОЛ Квазар, основана од неговиот кум Горан Паунов и АЕ СОЛАР АД од Тетово.
Да потсетиме целиот овој картел почнува со доаѓањето на СДС на власт. Ковачевски и Паунов ја формираат Пиксел груп неколку месеци откако Зоран Заев ќе направи влада, и набргу потоа градат цела фабрика.
Преку Пиксел груп тие во тој период од владата земаат 443.285 евра и уште 70 илјади евра преку Фондот за иновации. Во најголемиот дел од периодот кога државата и исплаќа пари на Пиксел груп, Ковачевски е заменик министер за финансии. Додека пак најголемата исплата од над 200 илјади евра се случува на 30 декември 2021 година, во време кога Ковачевски е мандатар за состав на нова влада.
Понатаму аферата Броило се разгранува и преку КМГ ЕОЛ Квазар кои како фирма за изведување и други услуги добила тендери од државата во висина од околу 2 милиони евра за инсталирање на соларни панели, и тоа откако СДС е власт.  Уште еден бизнис од над 2 милиони евра е и договор склучен помеѓу фирмата на кумот на Ковачевски и ЕВН за изградба соларни централи за ЕВН по принципот клуч на рака.
4 милиони евра само во договори со државни институции, претпријатија и фирми каде државата има интерес за фирмите околу Ковачевски, и тоа во време додека истиот е на функција.
Целиот овој систем свој пик достигнува откако Ковачевски е избран за премиер. Имено неколку месеци по назначувањето на Ковачевски на премиерската функција од него основана Пиксел груп заедно со уште една бугарска фирма ја формира АЕ Солар АД Тетово, која треба да гради фабрика во ТИРЗ Тетово од 54 милиони евра.
Во АЕ Солар АД Тетово, фирмата основана од Ковачевски има удел од 40%. Тоа е инвестиција од скоро 22 милиона евра кои треба да ги инвестира истата.
Постои сериозен сомнеж дека Димитар Ковачевски кој во овој период бил носител на јавна функција можел да влијае на процесите и со тоа да ја донел оваа фирма во надредена положба над другите учесници во деловното работење.
Отворено e прашањето дали сега ДКСК ќе се одважи и ќе отвори предмет за овој скандал. Исто така, бараме и од ЈО да не го игнорираат овој случај и да отворат постапка.
Но, останува неизбежен фактот дека криминалот и корупцијата се случува во врвот на власта и оваа власт знае да владее и функционира единствено преку задоволување на своите приватни бизнис интереси.

Николоски од Советот на Европа: Прислушкувањето и физичкото следење на опозицијата мора да престане, мора да се стави крај на злоупотребите на тајните служби

Во рамки на Советот на Европа се одржува комисија за правни прашања и човекови права. Една од главните теми е злоупотребата на системите за преслушување како и нелегалното физичко следење. Се зборува за злоупотребата на преслушувањето со цел нелегално следење на политички активисти, опозициони лидери, новинари, активисти на невладини организации и сите оние кои што властите сметаат дека се закана за нивна тоталитарно власт, вели Александар Николоски потпретседател на ВМРО-ДПМНЕ.

Николоски истакна дека на сесијата потенцирал дека ваква злоупотреба има и во Македонија од страна на власта на СДС, додавајќи дека веќе подолг временски период високото раководство на ВМРО-ДПМНЕ е под физичко следење како и следење на комуникациите.

Она што го напоменав во рамки на сесијата е дека ваква злоупотреба има и во Македонија. Веќе подолг временски период раководството на ВМРО-ДПМНЕ е под физичко следење, а исто така и под следење на комуникациите. За ова неколку пати алармиравме во јавноста, но не се преземени соодветни чекори, додаде тој.

Николоски смета дека преслушувањето мора да престане и власта наместо да ги злоупотребува тајните служби за ставање во подредена позиција опозицијата, да се насочи и фокусира кон демократското владеење.

На мое барање состојбата со злоупотребата на следењето во Македонија ќе биде внесена во извештајот кој што треба да биде усвоен во рамки на јануарската сесија на Советот на Европа. Извештајот предвидува јасни мерки и чекори кои што треба да ги преземат земјите членки во Советот на Европа, со цел да престане  нелегалното преслушување. Исто така предвидени се и казнени мерки доколку земјите не ги имплементираат овие чекори, рече Николоски.

Преслушувањето мора да престане. Физичкото следење мора да престане, затоа што тоа не може да биде начин на кој се добиваат политички поени или начин на кој се става во подредена позиција опозицијата затоа што власта ги злоупотребува овие системи. Еднаш засекогаш властите во Македонија мора да стави крај на злоупотребата на тајните служби, крај на опиеноста од моќта на тајните служби и да се фокусираат кон демократско владеење, вели Николоски.

Стоилковски: Билансната картица на ЈСП го потврдува долгот од 1.5 милиони евра кон приватните превозници

Почитувани ова е билансната картица на ЈСП од 01.01.2022 до 30.11.2022 година. Тука се гледа вистинскиот долг на ЈСП кон приватните превозници. Според картичката, на ТД Слобода превоз, ЈСП должи 61.812.593 денари. На Макекспрес превоз ЈСП до 30 ноември должи 29.912.861 денари. Тоа се 1.005.083 евра за Слобода превоз, како и 486.388 евра за Макекспрес превоз. Вкупно долгот на ЈСП кон приватните превозници изнесува 99.725.454 денари или 1.491.471 евра.
Почитувани, од 12 мај со ЈСП управува директор од редовите на СДС, поставен од Данела Арсовска.
Коалицијата Тачела, СДС и Арсовска потврдено и со тајните средби на Ковачевски со Данела Арсовска, уста не отвора за овој долг, а молчат затоа што ова е резултатот на тајните средби.
Почитувани, резултат на тајните средби е тоа што луѓето немаат леб на маса, а има за луксузи од провизии.
Наместо да се санира долгот, СДС и Арсовска веројатно намерно не го покриваат долгот, за да може да се реализира планот за превозот во Скопје да го преземе договорена бугарска фирма, којашто можеби по банкротот на ЈСП би можела и сиот превоз во градот да се предаде на истата фирма.
Затоа нема одговори на прашањето дали има договор за бугарска фирма која што доаѓа од близу Софија и дали автобусите се пристигнати во близина на Скопје?
Во овие прашања лежат и одговорите. Зошто нема ниту барање од СДС за оставка на Арсовска за долгот од милион ипол евра кон приватниците, ниту за штетната набавка на нафта за ЈСП за цели 118 денари за еден литар гориво.
Почитувани затоа нема и разбирање и Ковачевски и владата одбиваат решение за проблемот, а тоа е преземање на ингеренциите, обештетување на долгот на ЈСП кон превозниците, ревидирање на договорот за гориво со фирма на пратеник од СДС, но и ревизија за евентуалната улога на Драги Митевски Книга во делувањето на ЈСП?
Скопје не може да издржи уште еден неспособен и криминоген градоначалник.

Коцевски: Одговорност и оставки од Спасовски и Буши, дивеењето на синот на заменик министерот со возило со флешери не смее да остане неказнето

Одговорност и оставки од Оливер  Спасовски и Назим Буши, дивеењето на синот на заменик министерот со возило со флешери не смее да остане неказнето.

МВР и самиот Спасовски молчат и не одговараат на прашањата кои ги поставивме. На сите прашања одговор имаат во евиденцијата на МВР.

Црниот мерцедес со флешери со кое Ќерим Буши на 26-ти ноември дивеел низ Скопје е возило кое било во сопственост на Назим Буши, а потоа предадено на битолска фирма. МВР сето тоа го знае, доволно е само да се погледне историјатот на промени на сопственост.

МВР само требаше да одговори дали црниот мерцедес е купен од Телеком за Назим Буши, а потоа продаден на самиот Буши, за истиот да го предаде на битолска фирма. Но МВР молчи.

Ако немаше случај немаше да биде  казнет заменик началникот на СВР Скопје кој интервенирал возилото и лицето да бидат пуштени, со објаснување дека се работи за познат човек.

А, кој е тој познат човек, во возилото претходна сопственост на Назим Буши, сега во посед на битолска фирма сопственост на негови роднини, ако не е неговиот син, Ќерим Буши?

Оливер Спасовски и Назим Буши не смее да го заташкуваат целиот инцидент. Политичка одговорност мора да има. 

Коцевски: Дали Македонски телеком во 2021 година му продава црн мерцедес со таблички СК 0202 АП на Назим Буши?

Како што претпоставивме МВР на Спасовски продолжува со молкот за дивеењето во Скопје со приватно возило со флешери, кое според нашите сознанија било управувано од Ќерим Буши, син на заменик министерот во МВР, Назим Буши.

Како што веќе рековме ќе продолжиме да објавуваме детали. Уште еднаш прашуваме дали регистарските ознаки СК 0202 АП кои биле официјални таблички на мерцедесот со флешери сега постојат? И ако не, зошто не?

Воедно го прашуваме Македонски телеком дали им се познати регистарските таблички СК 0202 АП, и дали тие биле таблиците на црниот мерцедес 350 компакт кој тие го купиле во 2017-та година, како службено за Назим Буши?

Македонски телеком треба да одговори дотолку повеќе што во бордот на директори седат луѓе назначени од владата како Зоран Китанов, Нина Ангеловска и Дардишта.

Дали Македонски телеком во 2021 година му продава црн мерцедес со таблички СК 0202 АП на Назим Буши?

Ова се лесно проверливи работи и очекуваме одговор.

Мерцедесот на синот на Буши е купен од телеком, а потоа даден на Буши.

Одиме понатаму.

Дали Назим Буши истото возило го дава на битолската фирма во сопственост на негови роднини, во чија сопственост било возилото на денот на инцидентот?

Кого штити овде Спасовски? Одговорот на овие прашања им е познат на МВР. Зошто досега не е постапено? И дали целиот случај треба да заврши со казна за заменикот началник на СВР Скопје кој интервенирал за возилото да биде пуштено?

Дали Оливер Спасовски молчи и не смее да одговори на овие прашања, затоа што се плаши да не ја наруши коалицијата СДС – ДУИ?

Се држи ли МВР заложник за функционирањето на криминалната влада?

Наместо заташкување на случајот со казна на полициски службеници, веднаш оставки од Назим Буши и Оливер Спасовски.

Андоновски од Вашингтон од состанокот на IDU: Социјалдемократските партии не се грижат за демократијата и владеењето на правото, тоа е случај и во Македонија

Почитувани пријатели, на крајот сме на уште еден форум на Internacional Democrat Union, најголемата светска организација на десничарски партии. Како ВМРО-ДПМНЕ имавме делегација и активно учествувавме на овој настан. Можам да истакнам дека ги споделивме најважните прашања кои се однесуваат на Македонија, на состојбата во Македонија и на борбата против корупцијата како најзначајното прашање кое ги засега десничарските партии од регионот но и десничарските партии во целиот свет.
Определбата на сите партии од регионот и светот е дека мора да постои правна држава, владеење на право во нашата држава и силна борба против корупцијата.
Режимите на Социјалдемократските партии во светот, но и во Македонија покажаа дека тие не знаат да се грижат ниту за демократијата, ниту за владеењето на правото, а најмалку за борбата против корупцијата. Затоа многу е важен овој состанок на кој ги споделивме искуствата од државите кои се соочеуваат со случни проблеми, кои се хибридни режими и кои се многу ниско на скалата на Транспаренси интернешенал, и заедничката борба од овде од Вашинготн, но и од сите главни градови во светот мора да биде  против ваквиот систем и ваквите режими.
Како партија остануваме посветени на европската интеграција на Македонија, на атлантскиот пат на Македонија, на пат кој не смее да биде закочен со национални отстапувања, национални понижувања и газење на македонскиот национален идентитет.
Токму за овие прашања заборуваме на овој тридневен настан, продолжуваме активно да учествуваме во работата на IDU и на другите настани на нашите меѓународни партнери.

Коцевски: Спасовски да не заташкува, за кој познат човек се јавувал казнетиот началник, ако не за синот на Буши, каде е сега таблицата СК 0202 АП и дали постои од пред неколку дена?

Истражители од САД ќе гонат криминал, затоа што криминалците од министерството за внатрешни работи не може да гонат криминалци.

Еве еден пример за тоа како Оливер Спасовски и Назим Буши, СДС и ДУИ спроведуваат беззаконие во Република Македонија.

Веќе 13 дена министерството за внатрешни работи го релативизира инцидентот на дивеење во Скопје со приватно возило со флешери, кое беше запрено од полициска контрола, и за кое интервенирале највисоки лица од МВР да биде пуштено.

МВР на Спасовски го забошотува целиот овој случај и негира вмешаност на синот на Назим Буши.

Но да почнеме со ред.

Имено на 26-ти ноември, на патот од Качанички пат кон Скопје, полицијата забележала возило мерцедес, кое со голема брзина се движело кон градот, по што биле известени екипи да го запрат истото возило.

Откако возилото било запрено висок функционер во МВР барал од полициските службеници истото веднаш да биде пуштено. Функционерот кој барал пуштање на возилото бил помошник началникот на СВР Скопје, Вулнет Аземи. Истиот подоцна во обид да се заташка инцидентот е казнет затоа што се јавувал возилото да биде пуштено.

И тука МВР го затвора овој случај.

Да не дозволиме власта да го заташка овој инцидент во кој се вмешани највисоки функционери. Затоа пристапуваме кон расветлување на овој случај.

Спасовски треба да одговори, за кого се јавувал Вулнет Аземи, ако во возилото не бил Ќерим Буши, син на Назим Буши, заменик министер во министерството за внатрешни работи? И тоа со назнака дека се работи за познат човек?

Кој е тој познат човек, и дали истиот е Ќерим Буши, син на заменикот министер во МВР Назим Буши?

Каде е сега регистарската ознака за мерцедесот СК 0202 АП, за кој е отворен овој случај? И дали постои оваа табличка од пред неколку дена, и ако не зошто не?

Дали мерцедесот со овие регистарски ознаки бил во сопственост на битолска фирма, чии сопственици се во роднински врски со Назим Буши и дали истото најчесто било возено од неговиот син?

Спасовски да не се обидува да релативизира и да одговори на овие прашања. Одговорот, ако веќе не го знае се крие во евиденциите на МВР, до кои тој како министер има многу лесен пристап. И само за неколку часа може да даде одговор по сите овие прашања. Доколку Спасовски продолжи да молчи или да го заташкува случајот, ние ќе продолжиме со изнесување на други детали. Скандалот продолжува.

Стоилковски: Извор на хаосот во Скопје е коалицијата Тачела, одземање на ингеренциите и оставка на Арсовска е единствен спас за Скопје!

Скопјани и Скопје, македонскиот политички, економски и здравствен центар, не смеат да бидат жртва на лукративност, криминогеност и тајни средби на коалицијата Тачела, Ковачевски и Данела Арсовска.

Бараме неотповиклива оставка на Данела Арсовска од градоначалничката функција во Град Скопје, а владата да ја напушти коалицијата Тачела, да ги одземе ингеренциите за јавниот градски превоз во Скопје и подмирување на долгот кон приватните превозници.

Смачена им е на скопјани. Данела Арсовска покажа целосна неспособност да управува со Скопје, покажа целосен недостаток на слух за проблемите, и со својата лукративност предизвика хаос во Скопје.

Тајните средби со Ковачевски и креирањето на монструозноста Тачела, предизвика целосен колапс на македонската метропола.

Градоначалник на Скопје не смее да бега од скопјани и медиуми, не смее да не се обиде да ги надмине проблемите, и уште повеќе не смее да биде главна причина за хаос во градот!

Тајните средби со Ковачевски и креирањето на монструозноста Тачела, предизвика колапс во Скопје.

Ниедна провизија и тајна коалиција не чини повеќе од девастацијата на животот во Скопје!

Почитувани,

Владата мора да ја напушти монструозната креација, коалицијата на Ковачевски и Арсовска за бугарските бизнис и политички интереси.

Ничии интереси и провизии не смеат да остават цели семејства на возачите на автобуси без леб на маса, Скопје без нормален сообраќај, а жителите со ограничено движење!

Нема одговор за набавката на бугарските автобуси кои според нашите сознанија го турка коалицијата Тачела.

Бараме владата да и ги одземе ингеренциите на Данела Арсовска за јавниот превоз, но и да го реши проблемот со исплатата на долгот од еден и пол милион евра, да ги обештети приватните превозници коишто протестираат и тие да се вратат на дејноста.

Со одземањето на ингеренциите, бараме да се провери и можната улога на Драги Митковски во управувањето со ЈСП, како и ревизија на договорот за набавка на гориво за ЈСП со невообичаени високи цени, склучен со фирма на пратеник од владејачкото мнозинство.

Почитувани,

Скопје не може да издржи уште еден неспособен и криминоген градоначалник!

Петкоска: Изборот на директорката на Централниот регистар во Охрид е незаконски

Власта продолжува да ги злоупотребува државните институции, да фалсификува дипломи и лични податоци со цел задоволување на личните интереси на поединци.

Изборот на претседателката на Социјалдемократскиот сојуз Охрид, Кристина Крлеска Деспотоска за раководител на Централниот регистар во Охрид е незаконски од повеќе причини:

Прво, согласно Јавниот Оглас објавен за избор на одговорно лице за работење – раководител, кандидатот треба да има завршено високо образование Правни или Економски науки со најмалку 240 кредити стекнати според ЕКТС или завршен VII/1 степен и најмалку четири години работно искуство во струката од кои внимавајте добро најмалку ЕДНА ГОДИНА  НА РАБОТНО МЕСТО ВО ЈАВЕН СЕКТОР.

Второ, согласно евиденцијата од Агенцијата за вработување претседателката на Социјалдемократскиот сојуз Охрид, нема доволно работно искуство во струката на работно место во јавен сектор.

Трето, убедени сме дека за да го заобиколи системот, претседателката на Социјалдемократскиот сојуз Охрид, Кристина Крлеска Деспотоска својата партиска позиција ја има искористено за вршење притисок во Агенцијата за вработување, односно работното искуство кое го има стекнатo како ПОМЛАД РЕФЕРЕНТ ЗА ПЛАН И АНАЛИЗА, да го запише како ЕКОНОМИСТ ЗА АНАЛИЗА И ПЛАНИРАЊЕ.

Понатаму, претседателката на Социјалдемократскиот сојуз Охрид, Кристина Крлеска Деспотоска, согласно нејзиниот договор за вработување во ЈП „Охридски комуналец“ од 09.05.2012 година  до 10.11.2017 година е на работното место РЕФЕРЕНТ  ПО ПЛАН И АНАЛИЗИ, а по завршување на нејзиниот мандат како директор на ЈП „Градски пазар“ од 12.11.2021 година повторно се враќа на позицијата ПОМЛАД РЕФЕРЕНТ ПО ПЛАН И АНАЛИЗИ.

И во двата случаи работното искуство кое го стекнува претседателката на Социјалдемократскиот сојуз е со СРЕДНО ОБРАЗОВАНИЕ. Во случајот со јавниот оглас за избор на раководител на Централен регистар Охрид, потребно е минимум една година работно искуство на било која позиција од другата група за која е потребна диплома од завршено високо образование, односно факултетска диплома.

Што се однесува на работното искуство како директор на ЈП „Градски пазар“ тоа не се смета за искуство во јавниот сектор, согласно член 2, став 3 од Законот за вработени во јавниот сектор.

Од тука изборот на претседателката на Социјалдемократскиот сојуз Охрид, Кристина Крлеска Деспотоска за раководител на Централен регистар Охрид е НЕЗАКОНСКИ.

За овие незаконски дејствија постои документацијата од која јасно може да се утврди претходно наведеното и за истата со претставка ќе го известиме трудовиот инспекторат и Агенцијата за спречување на корупција од кои очекуваме во најскоро време да постапат по истата. 

Ги повикуваме сите надлежни институции да преземат мерки, а претседателката на Социјалдемократскиот сојуз Охрид, Кристина Крлеска Деспотоска, да покаже доблест и уште денес да се повлече од раководната позиција во Централен регистар и од политичкиот живот.

На Македонија, Охрид и охриѓани не им требаат непочитувачи на пропишаните законски решенија.

Оваа власт мора час поскоро да замине од политичката сцена, за конечно во Македонија да почнат да се почитуваат законите, кои ќе важат подеднакво за сите!

Одговорност мора да има!

Стоилковски: Дали се пристигнати автобусите за договорениот превозник од Бугарија на којшто Арсовска и Ковачевски сакаат да го дадат приватниот транспорт во Скопје?

Ниту по 48 часа нема одговор од градоначалникот на Град Скопје, Данела Арсовска на поставените прашања. Ниту пак има одговор на хаосот. А, хаосот е наменски, затоа Арсовска не одговара.

Дали во Македонија веќе се пристигнати автобусите од фирма блиску до Софија, за да го земат местото како единствен приватен превоз во Скопје, како резултат на инсистирање на Ковачевски на тајната средба со Арсовска?

Дали хаосот во Скопје е предизвикан за тргање на досегашните приватни превозници за договор од тајната средба превозот во Скопје да го преземе фирма приватна од Бугарија, блиску до Софија за која инсистира владата на Ковачевски?

Дали сметководителот од Ѓорче Петров од заднина управува со ЈСП за провизии, но и дали нема попуст од милионскиот договор за нафта за ЈСП со фирма на пратеник од власта, затоа што има провизии договорени да завршат во приватни џебови, наместо да се плати долгот?

Дали зад сите матни зделки на Град Скопје стои Драги Митковски познат како Драги Книга, а заедно со него во договарањето на провизиите дали е и близок роднина на Данела Арсовска?

Почитувани,

Блокадите, урнисувањето на Скопје, урнисувањето на буџетот, на вработените, хаосот во Скопје има причина, а тоа е договорот од тајните средби на Данела Арсовска со Димитар Ковачевски. Арсовска, со директорите од СДС, од ДУИ и од Левица предизвикаа целосен хаос во Скопје! Дуото Ковачевски – Арсовска се асови на бугарскиот бизнис и политика во Македонија.

Стотици луѓе немаат леб на маса, претпријатијата тонат во долгови, градот тоне во хаос, ама затоа има огромни провизии и договори!

Скопје не може да издржи уште еден криминоген и неспособен градоначалник!

Стоилковски: Зад хаосот на Ковачевски и Арсовска има договор бугарска фирма да го земе приватниот градски сообраќај?

Зад хаосот во Скопје, долговите и девастирањето на градските претпријатија стојат провизии од мрсни, богати тендери и договори без рабат!

Време е да се отворат картите, време е за вистински одговори:

Дали нема попуст од милионскиот договор за нафта за ЈСП со фирма на пратеник од власта, затоа што има провизии кои се договорени да завршат во приватни џебови?

Дали е точно дека зад сите матни зделки на Град Скопје стои Драги Митковски познат како Драги Книга?

Дали сметководителот од Ѓорче Петров од заднина управува со ЈСП за провизии?

Дали заедно со него и прв соработник во договарањето на провизиите од матните зделки е близок роднина на Данела Арсовска.

Но и, дали зад тргањето на приватните превозници стои желбата превозот во Скопје да го преземе приватна фирма од Бугарија за која инсистира владата на Ковачевски?

Дали на средбата Арсовска – Ковачевски било договарана оваа компанија од град близу Софија да биде единствен приватен превозник во град Скопје?

Почитувани,

Во моментот власт во Скопје се директорите на јавните претпријатија кои доаѓаат од СДС, од ДУИ и од Левица под патронат на Ковачевски и Арсовска.

Стотици луѓе немаат леб на маса, градот тоне во долгови, но затоа има огромни провизии!

Скопје не може да издржи уште еден криминоген и неспособен градоначалник!