Многу парови се соочуваат со прашањето дали нивниот партнер сè уште чувствува нешто повеќе од само носталгични спомени од мината врска.
Иако сеќавањата на минатите врски се нормални, постојаните мисли или споредби со бившите можат негативно да влијаат на сегашната врска.
Еве неколку клучни предупредувачки знаци што можат да укажуваат дека вашиот партнер сè уште не го преболел целосно својот бивш партнер – и што можете да направите во врска со тоа.
Постојана споредба со поранешен партнер
Ако вашиот партнер често ги споредува моменталните ситуации со искуствата што ги имал со бившиот партнер, тоа може да биде знак дека претходната врска сè уште зазема важен дел од неговите/нејзините мисли. Овие споредби може да изгледаат безопасни на почетокот – на пример, споредување на нов ресторан со омилено место кое го посетувале со бившиот парнет или споменување активности што ги правеле заедно. Сепак, ако споредбите меѓу вас и поранешниот партнер се повторуваат, време е да го вклучите алармот.
Замислете како вашиот партнер постојано споменува колку уметнички талентиран бил неговиот бивш партнер, што ве тера да се чувствувате потценети. Ова не само што е неправедно, туку ве става во конкурентска позиција во која не сте сакале да влезете. Постојаната споредба покажува дека партнерот сè уште целосно емоционално не ја исклучил претходната врска и дека во него постојат нерешени чувства.
Што можете да направите: Отворено разговарајте со вашиот партнер и кажете му/ѝ како овие споредби ве повредуваат. Бидете искрени и изразете ги вашите грижи без да обвинувате. Предложете да создадете нови спомени заедно и да се фокусирате на вашата иднина. Ако вашиот партнер е спремен да ве слуша и да го прилагоди своето однесување, ова е добар знак дека вашата врска му е важна.
Прекумерна емоционална реакција на настани во животот на бившниот партнер
Ако вашиот партнер реагира премногу емотивно на вестите за својот бивш партнер – како што се нова врска, раскинување или други големи настани – тоа може да укажува на нерешени чувства. Природно е луѓето да чувствуваат нешто кога ќе слушнат за минатите врски, но ако реакцијата на вашиот партнер оди надвор од разумните граници, тоа би можело да значи дека сè уште негува некои чувства.
Што можете да направите: Прашајте го вашиот партнер зошто толку силно реагира на вестите за бившиот партнер. Објаснувањето може да ви помогне да разберете дали станува збор за симболично затворање на последното поглавје или дали постојат подлабоки чувства што треба да ги разјасни пред целосно да се посвети на вашата врска.
Чест контакт со бивш партнер
Постои разлика помеѓу повремен контакт со бившиот партнер и редовната комуникација што може да ги избрише границите на пријателството. Ако вашиот партнер одржува редовен контакт со бившиот, често се допишува или се среќава „на кафе“, ова може да укажува на подлабока врска што тој/таа сè уште не ја раскинал/а. Дури и ако тврди дека е само пријателство, се поставува прашањето: Дали овие контакти се поважни од вашата моментална врска?
Што можете да направите: Разговарајте за вашите чувства во врска со овие контакти. Објаснете како ова влијае на вашето чувство на сигурност и побарајте од вашиот партнер да постави јасни граници. Здравата врска бара отвореност, но исто така е разбирливо што очекувате вашиот партнер да направи одредена дистанца помеѓу минатите и сегашните врски.
Идеализирање на мината врска
Тенденцијата да се идеализира претходната врска како „совршена“ може да биде проблематична. Ако вашиот партнер често зборува за својот бивш партнер со сладок тон и ги минимизира можните проблеми, тоа може да значи дека сè уште има идеализирана слика за својата мината врска. Носталгичниот поглед на минатото може да ја замагли реалноста и да го направи минатото да изгледа попривлечно отколку што всушност било.
Што можете да направите: Љубезно потсетете го вашиот партнер дека ниедна врска не е без недостатоци, дури ни онаа што ја имал/а со бившиот партнер. Охрабрете го/ја да размисли зошто врската не успеала и да се фокусира на вашата заедничка иднина. Целта не е да се негира минатото, туку двајцата да изградите врска во која ќе бидете целосно присутни.