Одделот за внатрешна контрола, криминалистички истраги и професионални стандарди при МВР поднесе кривична пријава против Б.М., главен инспектор во Одделението за лично обезбедување на министри, поранешни претседатели и други личности при ОЗОЛО.
Како што информира Министерството за внатрешни работи, тој се сомничи за кривично дело „злоупотреба на службена положба и овластување“ по член 353 став 1 од Кривичниот законик, бидејќи во февруари 2024 година евидентирал 32 часа прекувремена работа за две лица, иако знаел дека за нив не постоеле наредби за таков ангажман.
Кривичната пријава е поднесена до Специјализираното одделение за гонење на кривични дела сторени од лица со полициски овластувања и припадници на затворската полиција при Основното јавно обвинителство за гонење организиран криминал и корупција.