ЗА ПРВ ПАТ ВО МАКЕДОНИЈА: Вински салон викендов во Скопје

За прв пат во Македонија ќе се одржи настан кој е посветен на виното, винариите, винската индустрија и љубителите на вино. Овој викенд е резервиран токму за тоа. На 11 и 12 ноември, во новоотворениот хотел Мериот во центарот на Скопје сите посетители ќе може да уживаат на првиот Скопски вински салон- Винодонија. Скопскиот вински салон е интернационален настан со изложувачки карактер кој ќе се одржува секоја година со намера да се зголеми бројот на винарии, вински авторитети и нивото на винската култура во Македонија. Се очекува во иднина Винодонија да прерасне во традиционален вински салон. Повеќе од 30 винарии од земјава, како и од Балканот и Европа ќе ги презентираат своите вина. Александар Вучковски, претседател на Здружението на сомелиери на Македонија, прецизира дека на винскиот салон ќе се претстават девет странски винарии од Србија, Словенија, Црна Гора, Бугарија и Италија со автохтони сорти вино од тие региони, како и повеќе домашни македонски семејни винарии и веќе етаблираните големи винарии. Ивана Симјановска, интернационален вински судија, посочи дека ќе има дегустации на просеко и шампањ, спарување на вино и чоколада, предавања за вински маркетинг и како да се зголеми продажбата на вино во ХоРеКа секторот. Организатор на Скопскиот вински салон- Винодонија 2016 е група на македонски вински критичари, судии и ентузијасти кои под покровителство на Здружението на сомелиери на Република Македонија го организираат овој вински настан.Скопскиот вински салон е настан е наменет за трговци со вино, вински ентузијасти и вистински љубители на доброто вино.