10 мали и микро македонски компании денеска ја добија националната награда за најдобри брзорастечки фирми „Газели“. Од пријавените 33 компании само 10 ги исполниле критериумите за брзорастечки компании и добија грант од 615.000 денари за опрема и материјали.
Заменик министерот за труд и социјална политика Диме Спасов истакна дека во Р. Македонија микро и малите компании успешно работат и се развиваат, а државата преку конкретни чекори го поддржува нивниот раст.
Холандскиот амбасадор во Македонија Ваутер Пломп смета дека малите и средни компании се оние кои ја движат економијата на земјата напред и оти треба да бидат поддржани.
Жан Мари Стандард, од Холандската програма за поддршка на работодавачите која соработува со Конфедерацијата на работодавачи на Македонија истакна дека земјава е прва во регионот што воспоставува ваква награда и изрази надеж дека таа ќе стане традиционална.
Претседателот на Конфедерацијата на работодавачи Миле Бошков истакна дека од исклучителна важносет е малите компании да се научат да вложуваат во развој на бизнисот, со цел, како што рече да обезбедат сопствен раст, со кој, како што потенцира, да влијаат и на растот на економијата во државата.
За најдобри брзорастечки компании „Газели“ во Р. Македонија оваа година се избрани компаниите: „Пајдаков“, „Велекоб транс“, „Темов“, „Мултитекс“-Битола, „ Бисера Комерц“, „ Стара фурна“, Кожа-Мак“, „ Лајонис“, „Иборнет“ и „Унипласт“.