Премиерот Никола Груевски, денеска заедно со владина делегација во чиј состав се вицепремиерот Владимир Пешевски и заменик министерот за економија Христијан Делев, учествуваше на 4-тиот Самит на шефови на влади на земјите на Централна и Источна Европа и НР Кина и 5-тиот Економско-трговски форум што се одржува во градот Суџоу. Груевски имаше обраќање на Самитот каде се присутни 16 делегации од држави од Источна и Централна Европа и домаќинот, кинескиот премиер Ли Кечијанг. Тој посочи дека во рамките на посветеноста на НР Кина на процесот на соработка со земјите од Централна и Источна Европа и отвореност на кинеската економија за поблиски релации со нив, Македонија ја препозна и прифати можноста понудена од страна на кинеската влада за финансирање на инфраструктурни проекти во рамките на формираниот фонд со Варшавската иницијатива. Премиерот Груевски истакна дека Македонија е првата држава која потпиша конкретен договор за искористување на дел од предвидените средства за овој регион, имплементирани во изградбата на двете нови автопатски делници Скопје-Штип и Кичево-Охрид кои во моментов се во фаза на изградба. Се осврна и на можностите за идна соработка и реализација на проекти кои се од големо значење за државата и регионот. Изрази увереност дека со заеднички заложби ќе се унапреди севкупната взаемна соработка меѓу Македонија и Кина, во интерес на економската стабилност, заедничкиот просперитет на регионот и благосостојба на народите. Кинескиот премиер Ли Кечијанг изјави дека соработката на НР Кина со државите од Централна и Источна Европа е пример за исклучителна посветеност и искористување на расположливите потенцијали. Во рамките на Економско-трговскиот форум во градот Суџоу каде се присутни над 1.000 стопанственици и претставници на компании од Кина и 16 држави од Централна и Источна Европа учествуваат и претставници на повеќе македонски компании организирани од Сојузот на стопански комори. Форумот претставува можност за создавање на конекции за соработка и запознавање со бизнис климата и можностите кои се нудат за инвестирање и за зголемување на трговската размена.