„Ван Хол“ ќе инвестира уште 15 милиони евра и ќе отвори нови 400 работни места

Белгиската компанија за производство на автобуси „Ван Хол“ ќе инвестира уште 15 милиони евра во постојниот свој производствен капацитет во ТИРЗ Скопје 1 во наредните четири години и најави отворање на дополнителни 400 работни места. Изградбата на објектот ќе почне следниот месец. Договорот за реализација на втората инвестициска фаза го потпишаа денеска дирeкторот на Дирекцијата на ТИРЗ Виктор Мизо и Филип Ван Хол, сопственик на белгиската компанија, во присуство на премиерот задолжен за спроведување на изборите Емил Димитриев, претседателот на ВМРО-ДПМНЕ Никола Груевски и вицепремиерот за економски прашања Владимир Пешевски. Сопственикот најави дека производствениот капацитет ќе биде зголемен на 900 возила годишно наместо сегашните 500.Продолжувањето со нови инвестиции на белгиската компанија, според Пешевски, е потврда за добрите политики на Владата и поволната бизнис клима. Според него, и покрај политичката криза работата на економскиот тим на Владата резултира со нови инвестиции. Директорот на ТИРЗ, посочи дека со најавеното зголемување на капацитетите, Ван Хол ќе има најголем индустриски капацитет во државава со над 72 илјади метри квадратни. Белгиската компанија „Ван Хол“ е основана во 1947 година, а седиштето е лоцирано во Конинтсојкт. Најголемиот дел од производството го пласира на пазарите во Европа и во САД.